No son tres, sino dos puntas

Iazko euskarazko komiki-uzta oparoa izan zen, 29 ale guztira. Inoizko handiena esatea ez da gauza handia esatea, baina egia da, ordea. Datua ez da txikia.

Gainera, uzta horretan bildutako aleak izaera ugaritakoak dira. Hau da, estilo aldetik ugari.
Horregatik, kopurua ez ezik, aniztasun estilistikoa da nabaritu beharrekoa, gure uste apalean.

Horrela, nahiz eta merkatuaren tamaina txikia izan, susperraldi edo berpizkunde honetan euskal komikia normalizatua agertzen da estilo aldetik bai eta arte adierazpen gisa ere. Alabaina, txikitasuna indargunea bilakatu beharko zela pentsatzen dugu, gertutasunak elkarren ezagutza eta komunikazioa, ondorioz merkaturatzea, erraztu beharko zuelakoan.

Testu inguru honetan, aukeratu ditugun bi aleak egoera honen isla dira. (Euskal kulturaz ari garenez, "egoera positiboaren isla positiboa" zehaztuko dugu).

Batetik, Baigorrin sortu "Zonbat diru hainbat miru". Napartheiden tradizioan errotuko genuke lan hau. Euskal gizartearen metafora garratza, ironikoa eta dibertigarria. Euskal gizarteak ia ezagutzen ez duen euskal gizarteaz ari bada ere, Euskal Herri kontinentalean kokatzen da-eta saiak protagonista dituen lan hau. Hain da handia saien maltzurkeria txirrindulariak eta dena erasotzen dituztela! Lurra eta gizartearen folklorizazio prozesuan zein da, baina, putrea? Musika-erreferentziaz hornituta, hizkuntzaren trataera nabaritu beharrekoa da, hitz jokoz beteta baitago; bertso-saia barne. Hasieratik gaude jakinaren gainean: saietaz sahiesteko saiakera.

Bestetik, Garazi Albizua santurtziarrak Iruñeako Denonartean etxean argitaratu "Kemena" dugu. Istorio sortak, arrapaladan kontatuak. Poztekoa da, oso, mota honetako lanak euskaraz topatzea. Forma, hizkera eta generoaren aldetik gero eta zabalagoa den komikia egiteko modua ekarri du Albizuak gurera. Haur kutsuak duen marrazkiaren atzean zerbait gehiago dagoela ematen du aditzera; tentsioan jartzen du honek irakurlea; ezinegonean bustita. Xalotasunak istorio indartsuak ezkutatzen ditu, elkarrekin uztartuak. Amaitutakoan izenburua gogoratuko duzu.

Dstr.