2023, aldaketa eta erronka berrien urtea

2023. urtea amaitzear dago. Aste gutxi barru, hamabi kanpai-hotsak entzungo ditugu, mahatsak erlojuaren erritmoari jarraituz irensten saiatzen garen bitartean. 12 mahats eta 12 segundo, 12 hilabeteri agur esateko eta urte berri batean sartzeko, 2024an. Baina dena bere garaian. Oraindik badugu abendua, pasa den urtarrilaren 1etik aurrera bizi izandako guztia gogoratzeko. Eta ez da gutxi izan. Amaitzear dagoen urte hau, zalantzarik gabe, urte trinkoa izan da Koldo Mitxelena Kulturunearentzat. Aldaketak, agurrak, hasiera eta erronka berriak, ziurgabetasuna, topaketak, ospakizunak, ilusioa... Urte erabakigarria Koldo Mitxelena Kulturunearen etorkizunerako.

 

Ate bat itxi, baina hainbat leiho ireki...

2023an, ekainaren 16an hain zuzen, KMKk ateak itxi zituen 30 urteko jardueraren ondoren. Garaia zen zentroa bere etorkizunerako prestatuko zuten obrak hasteko. Ikasketa gelak isilik geratu ziren. Ordenagailuak itzali egin ziren. Ikertzaileek euren ikerketak bertan behera utzi zituzten. Azken erabiltzaileak eleberri eta beste liburuekin kargatuta atera ziren eraikinetik. Une berezia, zalantzarik gabe, bai eraikinarentzat, bai bertako biztanleentzat ere.

Egun batzuk barru, eraikinak lo zirudien. Hori ez zen errealitatea, ordea. Barruko lan-erritmoa frenetikoa zen. Uda osoan zehar funts guztiak birkokatu ziren eta egoitza berriak egokitu ziren, KMK-ko erabiltzaileak berriz ere hartu ahal izateko. Ekainaren 23an bertan, Ekitaldi Aretoa Alde Zaharreko Santa Teresa Komentuan jarri zen martxan, Mosaico Italiano zikloaren hirugarren edizioari amaiera emango zioten kontzertu eta aperitibo batekin. Areto honi, ohiko programazioa eskaintzen jarraitzen dugun honi, bi gune berri gehitu zitzaizkion (biak Komentuan bertan): Klaustroa, arkupedun galeriak dituen patio angeluzuzen eder bat, eta Atari, sarrera nagusiko atarian dagoen erakusketa-gune txiki bat. Aste batzuk geroago, uztailaren amaieran, Liburutegiko mailegu-gune berria inauguratu zen Errege Katolikoen lokalean. Espazio eroso horretan, erabiltzaileek plazer handienaz gozatzen jarraitu ahal izan dute: irakurketaz. Udazkena iristearekin batera, KMK-ren azken bi guneak jarri ziren martxan: Liburutegiaren bulegoak Villa Asuncionen eta ikertzaileentzako zerbitzua Oñatiko Gipuzkoako Probintziako Artxibo Historikoan.

Martxan jarraitzen dute KMK-ko zerbitzuek lanek dirauten bitartean!

 

… eta online gune berri bat

Baina hori ez da aldaketa bakarra izan. Izan ere, aurten bizitako guztia KMK-ren webgune berriaren bidez kontatu ahal izan dizuegu. Koldo Mitxelena Kulturunearen zerbitzu guztiak biltzen dituen gune digitala: liburutegia (funtsak, katalogoa...) eta zentroko gainerako jarduera eta zerbitzuak (erakusketak, ekitaldiak, K bulegoa...).

Webgune berria, online topagune berria. Bertan, Santa Teresa Komentuan antolatutako ekitaldien eta Liburutegiaren azken berrikuntzen berri izan dezakegu, baita irakurketa berriak topatu edo gure ikerketetarako interesgarriak diren funtsak aurkitu ere. Espazio berri honetan ikus-entzunezkoek protagonismoa irabazi dute. Izan ere, zentroko ekitaldien zuzeneko emanaldiek pisu handia hartu dute: denbora errealean jarrai daitezke edo ondoren gure Youtubeko kanalean kontsultatu. Azken batean, erabiltzaileen beharretara eta eskaeretara egokitzeko lanean jarraitzen duen webgune berri bat eskaini nahi izan dizuegu.

Eta hori guztia, gainera, irudi berri baten pean, KMK-ren logo berrian.

 

Kalitatezko liburutegia…

Buru-belarri jardun dugu azken hilabetetan, baina lan horrek bere sari izan du. Izan ere, KMKko Liburutegiak AENOR zigilua lortu du, eskaintzen dituen lan prozesuen eta zerbitzuen kalitatea aitortzen duenak. Honek, bisitarien gogobetetasuna areagotzeko etengabeko hobekuntzan lan egiten jarraitzera animatu du taldea. Hori da gure helburua!

 

… eta etengabe gozatzeko agenda

Hilabete hauetan zehar, Liburutegia birkokatu eta egoitza berriak egokitzen ziren bitartean, KMK-ren agendak hainbat hitzordu interesgarri eta erakargarri eskaintzen jarraitu du. 2023an poesiaz gozatu ahal izan dugu berriro Poetika zikloarekin edo zinemaz Mosaico Italiano-rekin. Crossoverren telesail berriak deskubritu eta horien inguruan hitz egin dugu, eta zinemaren mundura hurbildu gara Zinemagileen Elkarrizketei esker. Lumafest jaialdiarekin gazte literaturaren aldeko apustua egin dugu eta liburuen ilustraziora hurbildu gara MarraziOak jardunaldiekin. Kultur ekoizpen eta kontsumo formatu berrietarako espazio espezifiko bat eraikitzen aitzindariak izan gara, podcast-a kasu, Parentesi jaialdiaren lehen edizioaren bidez. Iparraldearekin zubiak eraiki ditugu eta euskarazko kultur sorkuntza bultzatu dugu Iparraldea Bertan ekimenarekin. Eta pentsalari, historialari, antropologo, irakasle, artista, idazle, kazetari... handien eskutik entzun, hausnartu, partekatu eta ikasi dugu Gipuzkoako Historiako Pasarte Ezezagunetako hitzaldietan, Garaikidetasunaren Krisia zikloko elkarrizketetan edo Antiqua bezalako jardunaldietan.

 

Jardueraz eta bizitzaz betetako urtea, betiere etorkizunera begira. Eta hortan ari gara, etorkizun horretan pentsatzen eta horretarako prestatzen, 30 urte hauetan KMK-ko ateak zeharkatu dituzten pertsona guztiak eta gutxienez beste 30 urtez gurutzatuko dituztenenak hartzeko. 

Zuekin eta zuentzat ilusioz lan egiten jarraitzen dugu!