2023 urteko lehen erdiko saio irekiak eta formazioak: kronikak eta baliabideak

Urteko lehen zatian, hamaika gai izan ditugu hizpide  lurraldeko eragileekin izandako elkarrizketetan, hala nola artisten artikulazioa, aurreikuspenak, Artistaren Estatutua eta balio pedagogikoa.

Elkarrizketa eta hausnarketa indartzeko xedez, saio irekietan kronika moduko bat sortzen dugu, bertan mintzatutakoa laburbilduz, eta formazioa saioetan, aldiz, baliabideak bertan landutako edukiek osatuta. Irailetik aurrerako saioak heldu bitartean, hemen dituzue bilduta kronikak eta baliabideak, jazotakoa gogoratu eta hainbat gaitan sakontzeko. Guardasola edo aterpe pean irakurtzeko aproposak.

Urte hasieran, bi gai izan genituen hizpide saio irekietan: alde batetik, artista plastikoen artikulazioa eta, bestetik, proiektuak bideragarri bihurtzeko aurreikuspen egokiak.

Urtarrileko saio irekian, Artista plastikoen artikulazioa Gipuzkoan: aukerak eta erronkak lerroburupean, gaiari berriz heldu genion bi urte lehenagoko argazkia eguneratzeko asmoz. Horretarako, hiru taldetako kideak gonbidatu genituen K bulegora elkarrizketan parte hartzeko:  “Artistak-etc” plataforma, Zapart Euskal artisten sarea eta Eskuahaldunak Euskal eskultoreen elkartekoak, hain zuzen ere.

Artista plastikoen artikulazioa Gipuzkoan: aukerak eta erronkak
Saio irekiaren kronika

Bestalde, martxo hasieran, Besainera jo genuen Nola egin aurreikuspen egokiak gure proiektu artistiko eta kulturalak bideragarriak izan daitezen? galdera soinean generamala.

Saioaren mamia honako hau izan zen: nola egin aurreikuspenak jarduera sendoak lantzeko, kontuan hartuz gure garapen positiboa ere zaindu behar dugula.

Nola egin aurreikuspen egokiak gure proiektu artistiko eta kulturalak bideragarriak izan daitezen?
Saio irekiaren kronika eta manifestua

Apirilean bi saio ireki antolatu genituen bulegotik kanpo: Azpeitian eta Irunen, bertako testuingurua bertatik bertara ezagutzeko asmoz.

Azpeitiko Dinamoa Sormen Gunean gazteekin jorratzen duten lan interesgarria izan zen abiapuntua, belaunaldi berriengandik ikasteko asmoz. 

Belaunaldi berriek nola sortu eta garatzen dute kultura?
Saio irekiaren kronika

Irunen, aldiz, Oiasso Museoan egin genuen sartu-irten bat. Elkarlanaren mugez hausnartzea zen helmuga, baita Bidasoaldean garatzen den mugaz gaindiko lankidetzatik ikasi, geure mugak gainditzeko xedez. 

Elkarlanaren mugak, mugaldeko elkarlana
Saio irekiaren kronika

Maiatzean, Gipuzkoako Dantzaguneak eta K bulegoak saio berezia antolatu zuten Artistaren Estatutuaren gainean, eta ondotik, bi baliabide sortu estatutuaren esparru orokorra eta Arte Eszenikoen sektorean duen eragina azaltzeko. Ainara LeGardonek gidatu zuen saioa.

Artistaren Estatutuaren garapenean egindako aurrerapenak eta arte eszenikoetan duten eragina
Baliabideak

Maiatzean, formakuntza saioa antolatu genuen Kultur ekimen profesionalak sendotzeko gakoak lantzeko asmoz. Elkarrizketa formatua aukeratu genuen sendotzeari buruzko hausnarketa irekia eragiteko asmoz. Bi adituk parte hartu zuten solasaldian: Juan José de Andrések eta German Valderramak.  ​​​​

Kultur ekimen profesionalak sendotzeko gakoak
Formakuntza saioaren baliabidea

Uda bete-betean murgildu aitzin, saio freskagarri bat antolatu genuen, limonada suspergarriak lagunduta, kultura proiektuen balio pedagogikoaz hausnartzeko.

Zein da gure ekimen artistiko eta kulturalen balio pedagogikoa
Saio irekiaren kronika

Irailetik aurrera formazioa saioak eta bestelako saioak antolatzen lanean dihardugu. Bitartean, K bulegoan zain zaituztegu edozein kontsulta argitzeko edo zure proiektua bidean laguntzeko.