Abenduko komiki eta eleberrien nobedadeak

Iritsi berriak dira nobedade hauek mailegura. Azken asteetan jasotako fikziozko lanen zerrenda duzue jarraian, eta baita horien arteko aukeraketa bat ere modu xehetuagoan. Hemetxe irakurri, estekaren bidez katalogara sartu eta erreserbatu dezakezue gustukoena gero bila pasatuz (Errege-Erregina katolikoen kaleko 16 zenbakian). Gozatu!

ELEBERRIAK
Sawako Ariyoshi-ren “Las dos rivales” eleberria, VIII. mendeko japoniar gorte inperialeko bi emakumeren istorioa da, Shōshi eta Kōken. Bi emakumeak, kontrol politikoa eta enperadorearen atentzioa lortzeko lehian sartuta daude, azpijoko eta sakrifizio pertsonalek berebiziko garrantzia duten mundu batean. 

“La niña de la nieve” eleberrian, magia, natura eta giza drama nahasten dira. 1920ko hamarkadan Alaskako Yukon herrian kokatuta dago, Mabel eta Jack bikotea dugu istorioaren ardatz. Bikote horrek, seme bat galdu eta bakardadearekin eta minarekin borrokatu ondoren, Alaska izoztuan dagoen urrutiko etxe batera aldatzea erabakiko du. Egun batean, elurrezko irudi bat egiten dute, neskato baten itxura hartzen duena. Eta berehala elurrezko neskatoak bizirik dagoela ikusiko dute. Eleberriak maitasuna, dolua, itxaropena eta naturarekiko lotura bezalako gaiak aztertzen ditu.

“Barrengaizto” eleberrian Lambro ibaiaren bazterrean datza hamahiru urteko Francesca, uharriak lepondoan eta ipurdi biluzian iltzatzen zaizkiola eta gainean gizon baten gorpua duela. Hurbil du Maddalena, uretan belauniko, lohiturik eta eztulka. Urtebete lehenago hasi zen bi neskatxen arteko harremana, Francesca txunditurik gelditu baitzen denek “Barrengaizto" deitzen zuten haren izaera matxinoarekin. Arau sozialak beste ezeren gainetik betearazten dituen amari entzungor eta kaleko mihi gaiztoek diotena gorabehera, Francesca Maddalenaren lagun taldera bilduko da bizitzeko molde askeago batez jabetu nahian. 

Simon Scarrowren “Muerte en la noche: un thriller en Berlín en tiempos de guerra” bigarren Mundu Gerran, Alemania nazian girotutako suspentsezko eleberria da. Britaniar zerbitzu sekretuko agente bat, nortasun faltsuarekin Berlinen infiltratuko da gerraren iluntasunean. Naziek kontrolatutako hirian sartu ahala, traizio, sekretu eta konspirazio sare bati aurre egin beharko dio, etsaien funtsezko operazio bat desegiten saiatzen den bitartean. 

Donald Antrimen “Otro Manhattan”, kokapenik gabe eta alienazioan harrapatuta aurkitzen den gizon baten istorioa kontatzen da, protagonistak galera pertsonal batzuei aurre egin behar die New Yorken bizi den bitartean. Bere begirada introspektibo eta zatikatuaren bidez, nobelak nortasuna, giza harremanak eta deskonexioa bezalako gaiak aztertzen ditu, erabat bakartia den hiri honetan. Umore beltzarekin eta estilo paregabearekin, Antrimek bizitza modernoaren kaosean zentzua aurkitzeko borrokari buruzko hausnarketa egiten du.

“Euri gorriaren azpian” Asier Serranoren eleberrian paperezko zeru zabalera begiratu, eta hodeiek markatzen duten mapa gero eta puztuago eta hurbilagoan iraganaren ekaitz perfektu gorria nola lehertuko den kontenplatu daiteke. Hogeita bost urte atzera, estatu kolpea hirira heldu zen egunean, ezagutu zuen idazletzatik erretiratua den emakumeak gizon antzezlea. Ordutik, zazpi urteko diktadura, eta hemezortzi urteko ustezko demokrazia. Orain, emakumea hirira itzuliko da, hilzorian den gizonaren enkargua betetzera.

KOMIKIAK
“El rey de los caracoles” komikian Gros eta Cheto, Texaseko Amarillo herriko bi polizia detektibek, krimen-eszena arraro samar batekin topo egiten dute: itxuraz erritual sataniko bat dirudien hilketa, tartean barraskilo kanibalak dituena. David Pamiesek eta David Sanchezek egindako komikia, Finestres 2023 sariaren irabazlea. 

“Goizero” Javier de Isusiren komiki berriak kalte emozional larriak dituzten adingabeen harreran espezializatutako bi familien errealitatea erakusten digu. Minez betetako komiki errealista den arren, samurtasunez eta itxaropenez beteta dago.

“Todo mal: un cómic goblin” komikian Moa Romanovak izu-atake, depresio eta artistaren bizitza prekarioari buruzko autobiografia bat aurkezten digu. Bat-batean, gizon ospetsu batek bere mezenas izan nahi duela esango dio eta dena alda daitekeela ikusiko du. Apa-apa Cómics etxeak argitaratutako komiki honek Eisner saria eskuratu zuen 2021ean.

“Mazinger Z: alter ignition” Mazinger Z-ren jatorriaren berrinterpretazioa da Yu Kinutanik sinatuta. Bertan, Dr. Infiernok eta Dr. Kabutok antzinako bioteknologia mizenastarra aurkitzen dute, baina lehenengoaren asmo gaiztoak direla eta, Kabuto Doktoreak Mazinger Z proiektua martxan jarri beharko du.

“Anatomía de un corazón” komikian 50eko hamarkadako Txilen kokatutako istorio honen protagonista, Aurora ezagutuko dugu. Santiagoko fakultatean medikuntzako ikaslea izanik garaiko aurreiritzi matxistei aurre egingo dien emakumea. Komiki hau Antonia Bañados egilearen amonaren benetako istorioan oinarrituta dago. 

Emma Rios marrazkilariaren “Hexed” seriearen edizio integrala da honakoa, komiki amerikarrera saltoa ematen lagundu zion lana da hau. Fantasiazko, abenturazko eta beldurrezko komiki honetan, Lucifer azpimunduko izakiei objektuak lapurtzen aritzen da, eta bere zelatan dauden munstro mota guztiei aurre egin beharko die.