Bidai kaierak. Mikel Lasa

Inaugurazioa:
Martxoak 4, 19:30
2014ko martxoaren 4tik apirilaren 26ra

Ordutegia:
Asteartetik ostiralera
16:00 - 20:00
.
Larunbatetan:
11:00 - 14:00 /16:00- 20:00.

.

.

BIDAI KAIERAK. Mikel Lasa

Sarrera hau idazterakoan,  1989an eguneroko moduan idatzitako anotazio batez ohartu naiz non,iragarpen bat  bailitz bezala, aurreikusten bainuen hamabost urte geroago, erretiroa lagun,  bizitza-proiektua gauzatu ahal izango nuela:

 Kontxako aulkietan eserita ikusi dudan hirurogei urteko irlandarra, denboraldi honetanmaiz amets egin dudan nomadismoaren premonizio bat ote da, erretirorako iragarpena?  Dena den, udara honetan zehar bizitza-proiektu honetaz behin eta berriz egin burutapenen abia puntu eta inspirazio iturri  izan da.

Nomadismo hitza dramatikoegia da nire kasuan, noski; esan dezagun horren ordez bidaiatzea, ez nolanahi halere: sarriro, laztasun doi batekin, gorputza engaiatuz bidean , bakarrik, zentzuek bortizki  suma ditzaten bidaiaren sentipenak.

Tenorea iritxi  zenean, oharkabe hasi nintzen bizitza-projektu horren ildotik aintzinatzen. Trenez edo egazkinez  joan izan naiz  bixitatu nahi nuen lurralde ingururaino, eta, han, eskuleku gainean  poltsa mordoilua lotu, bizikleta gainera igo eta hasten nintzen zehaztasunik gabe burututako behin behineko ibilbide programari  jarraitzen.  Bidaialdi bakoitzak hamar eta hamabost  egun arteko  epea  irauten zuen. Horrela korritu  ditut azken hamar urteotan  erakusketan agertzen diren herrialdeak, behin eta berriz , Italia izan delarik  errepikatuena berarekiko dudan atxikimendua dela eta.

Nire lehenengo bidaia Cortonara egin nuen, Piero de la Francescaren zaletuek ongi dakiten  zirkuitoaren abia puntutik: Cortona , Arezzo, Borgo de Sansepolcro, Urbino eta Rimini. Bidaiaren ardats gisa gogozko nuen halako pertsonaien bat aukeratzeak  akuilatu egiten ninduen eta  halakoren bat gogoan nuela egin dut bidaia asko, hala nola:

Recanati, Leopardiren jaioterria . Hotz eta bakarti, mendilerro garai baten gainean, aizeak zeharkatzen zituen kale hutsetan nenbilela  hobekiago ulertu ahal izan dut poetaren nihilismoa eta L´infinito bere poema famatuaren zentzua:…  Inmensitate honetan da murgiltzen  pentsamendua eta  itsaso honetan hondoratzea laket zait;

Cesenatico, non Leonardo da Vincik diseinatutako  portuan ikusi  baitaitezke Garibaldik Siziliako konkistan erabili zituen  garaiko arrantza belauntzi askotarikoak: bragozzo d´altura, battana ,trabaccolo.

Irlanda ipar mendebaldean , Sligo, W.B. Yeatsen jaioterria, eta  haren hilobia, epitafio ageri duena:

 Cast a cold eye
On life, on death
Horseman pass by

Proentzako lautadan, Van Goghen bila:  Camargue, Les Saintes-Maries-de-la-Mer, Arles, St. Rémy, Les Alpilles; Porto Venere , La Speziako badiaren sarreran  eta Cinque Terre, Itsasoa eta mendi lerro garai baten artean kukutua, biak Montaleren geopoetikaren sorleku;

E.a….

Besteetan , lurraldeari buruz nuen aintzin irudiak erakartzen ninduen.

Bidaia hauetan eginiko akuarelak , pastelak eta marrazkiak osatzen dute erakusketa honen ardatz nugusia.

Ekiteko erak markatu du obra gehienen estiloa: gorputza tinko, burua ernai, ikusminak bultzatzen ninduen bidaia osoan. Aldian aldi, paisaiaren xehetasun  bat edo jendarteko bitxikeriaren bat marraztu edo pintatzeko  gogo bizia  sentitzen nuen, zutik, eserita edo trenaren martxan . Eta halaxe ekiten nion, bat-batean,  abiada osoan ,zuzendu barik.

Halako uneetan,  argi  eta azkar dabil eskua  orriaren azalean, sismógrafo-markagailuaren antzera errealitatetik datozkion taupaden artean. Ekiteko era  honek ez du beti arrakasta lortzen, baina, lortzen duenean, nabari da zerbait bizia eta freskua atxiki duzula, eta badakizu ez dela ezabatuko freskura eta bizitasun hori, lortu duzuna apala izanik ere .

 Mirari txiki hori bilatzen dut nik.  

. 

 

 

Mikel Lasa  

 

 

 

 

 

 

 

 

 

 

 

.