Busca Isusi, euskal gastronomiako maisu aitzindaria

José María Busca Isusik euskal gastronomia zabaltzen eman zuen bere bizitzaren zati handi bat. Izan ere, "euskal letra gastronomikoen patriarka" deitzen zitzaion, hainbat komunikabidetako artikulu eta lankidetzez gain, gastronomiako, enologiako edo mikologiako liburuak ere argitaratu baitzituen.

Busca Isusi Zumarragan jaio eta hil zen (1916-1986). Batxilergoa Donostiako Jesusen Bihotza ikastetxean ikasi ondoren, Madrilgo Unibertsitatean Natur Zientziak ikasi zituen eta Bromatologia adarrean espezializatu zen.

Urteak igaro ahala, 50eko hamarkadan hasi zen ezaguna egiten bereziki Gipuzkoan eta kazetaritza-lanen bidez baina, batez ere, irrati-emanaldiengatik. Entzuleekin berehala konektatu zuen, eta kontsultategi bat ireki zuen, askotariko gaiei erantzuteko; horien artean, gastronomikoak nabarmentzen ziren, garai hartan ez baitziren oso ohikoak komunikabideetan.

Gerra zibilaren ondorioz, eskasia- eta errazionamendu-garaia izan zen hura. Hala ere, Busca Isusi, uhinen bidez, ilusio-saltzaile bihurtu zen, etxekoandreen aholkulari eraginkor, eta ilusioa kutsatzen jakin zuen.

Dibulgazio-lanarekin jarraitu zuen hainbat argitalpen eta hedabidetan, hala nola Munibe, Redención, El Economista, Norte-Exprés edo El Diario Vasco. Liburu askoren egilea ere izan zen.

Eta horrela hitz egiten jarrai genezake..., baina animatu egiten zaitugu Busca Isusiren Funtsa ikustera, non aldizkari eta liburuetako artikuluak, aldizkako argitalpenak, eskuizkribu batzuk eta material grafiko anitza gordetzen duena.

Eta, amaitzeko, gaur, Taparen Munduko Egunean, aipamen berezia egin nahi diegu euskal gastronomiaren ikur diren pintxoei. Gehiago jakin nahi baduzu edo egiten ikasi nahi baduzu, egin klik irudi honetan: