Busca Isusi, Gipuzkoako gastronomoa

Gastronomiari buruz mundu osoan ezaguna den San Sebastián Gastronomika kongresuaren harira, aurten 25 urte betetzen dituena eta egun hauetan Donostian egiten ari dena, José Mª Busca Isusi gogoratu nahi dugu, idazle eta kritikari gastronomiko gipuzkoarra (Zumarraga, 1916-1986), "euskal sukaldaritzaren lehen gurua" bezala ere ezaguna.

Busca Isusik Natur Zientziak ikasi zituen Madrilgo Unibertsitatean, eta Bromatologia espezialitatean espezializatu zen. Horri esker, nutrizio gaietan aurreratua izan zen.

Bere bizitzaren zati handia sukaldaritzari eta elikadurari buruzko ezagutzak zabaltzen eman zuen, artikuluak eta liburuak idazten eta hitzaldi ugari eskaintzen. Horrela, ospea lortu zuen, maila nazional zein nazioartekoan, Euskal Sukaldaritza bezala ezaguna zen horretan. Gainera, irrati- eta telebista-saioetan ere parte hartu zuen.

Euskal sukaldaritzako ohitura eta tradizioekiko sentiberatasunak bultzatuta, Gastronomiako Euskal Kofradiaren sortzaileetako bat izan zen, eta, ondoren, haren lehendakaria. Aranzadi Zientzia Elkarteko lehendakariordea ere izan zen, Espainiako Gastronomia Akademiako akademikoa, eta sari ugari jaso zituen.

KMK Liburutegiak Busca Isusiren funts pertsonala du, 6.800 dokumentu baino gehiagoz osatua, besteak beste, sukaldaritzarekin lotutako monografiak, aldizkarietako eta liburuetako artikuluak, aldizkako argitalpenak, eskuizkribu batzuk eta material grafiko desberdinak.