Carlota Pereda eta Alauda Ruiz de Azúa Koldo Mitxelena Kulturunean egongo dira gaur

Carlota Pereda eta Alauda Ruiz de Azúa zinemaren munduan etengabe entzun ditugun bi izen dira, eta ez da gutxirako. Biek 2022an haien lehenengo filma aurkeztu zuten eta momentu horretatik ez diote arrakasta eta sariak jasotzeari utzi. 

Goya sarien galak pozak ekarri zituen bientzat. Alauda Ruiz de Azúa Cinco lobitos pelikulan egindako lanagatik “Zuzendaritza berri onena” saria eskuratu zuen, eta aldi berean, Carlota Pereda izendatua izan zen kategoria berean Cerdita filmagatik. Gainera, ez zen bietarako izendapen bakarra izan, eta bakar bat ere ez zen joan etxera eskuak hutsik zituela. 

Zuzendaritza-prozesuetan etengabe erabakiak hartu behar dira, eta prozesu artistiko eta tekniko hori ikusezina da pantailan, baina azken emaitza ikusi ahal izateko ezinbestekoa da. Hori ondo dakite Alaudak eta Carlotak, eta gaur, martxoaren 9an hitz egingo dute 19:00etan Koldo Mitxelena Kulturunean horri buruz. 

Zelan garatzen da Cerdita bezalako proiektu bat? Nolakoa de Cinco lobitos pelikula baten filmazioa? Bi profesionalek, haien lehenengo opera primaren ondoren, prozesu osoa nolakoa izan den azalduko dute, eta, gainera, beren obrekin bisitatu dituzten jaialdien pasadizoak eskainiko dizkigute. 

Cerdita – Carlota Pereda 

Cerdita laburmetraia zela jaio zen. Formatu horretan Goya eta Forqué sariak irabazi zituen “Fikziozko Film Labur Onena” kategorian. Sinopsian jada sumatzen zen proiektu honek jarraipen bat izango zuela, eta 2022an heldu zen zinematara luzemetraia bezala. 

Film honetan Sara ezagutuko dugu. Berarentzat uda heltzeak bere gorputzaren kontrako irainak heltzea esan nahi du. Baina uda horretan, ezezagun bat agertuko da herrian, eta bere erasotzaileak bahituko ditu. Sarak erabaki beharko du: hitz egin eta bere erasotzaileak babestu, edo agertu den gizon hori salbatu? 

Carlota Peredak beste urrats bat eman du zineman eta filmazioan iraunkortasunaren eta bateragarritasunaren erronkak jarri zizkion bere buruari. Horren bidean, filmak dagoen landa-ingurunea errespetatu du, eta, gainera, filmatzen zen bitartean lan taldeko partaideei bere lana bizitza pertsonalarekin bateratzeko aukera eman die. Lorpen hau hainbat jaialditan goretsi izan da. 

Cinco lobitos – Alauda Ruiz de Azúa 

Cinco lobitos filma Oscar sarien 95. edizioan Espainia ordezkatzeko aurrehautatuetako bat izan zen. Hautatua izan ez zen arren, arrakasta ugari izan du, eta jaso dituen sarien artean, “Espainiako film onenaren” Urrezko Biznaga dago, 2022ko Malagako  Zinemaldian lortutakoa. 

Alauda Ruiz de Azúak Amaiaren amatasunaren historia kontatu du pelikulan, baina aldi berean, alaba izatea nolakoa den ere erakutsi du pertsonaia berdinaren bidez. Horretarako, Susi Sánchez eta Laia Costa aktoreak izan ditu lagun, Karra Elejalde eta Mikel Bustamanterekin batera. 

Ruiz de Azúak amatasunari buruzko belaunaldi-erretratu gisa definitu du pelikula, eta, horretarako, etxera bueltatu da, Euskal Herrira. Hor istorio hau sortu du kontatzeko nola amatasunak bizitza nola aldatu ahal dizun, baita zure gurasoak ikusteko modua ere.