Eginez ikasiz. Liburutegien Egun berezia

Hamarkada bat baino gehiago da Koldo Mitxelena Kulturuneak, Donostia Kulturak eta Medialab Tabakalerak jardunaldi hau elkarrekin antolatzen dugula. Hala ere, aurten gure erosotasun gunetik atera nahi izan dugu eta, beste liburutegi eta proiektu batzuen esperientziak entzuteaz gain, lanari ekin eta geure proposamenak diseinatu (edo gutxienez saiatu) nahi izan ditugu. Hortan jardun genuen urriaren 25eko goizean zehar Medialaben.

9:00etan eraikineko ateak irekitzen dizkigute. Publikoarentzat oraindik itxita egon arren, Tabakalera dagoeneko bizi-bizirik dago. Medialab lasai oraindik. Hantxe dugu Edurne Ormazabal. Harrera beroa egin ondoren, Arantza Mariskali eman dio hitza, Liburutegien Egun honetan planteatutako dinamikari emandako erantzun bikainagatik esker onez eta pozik. Ondoren, gure mentoreak izango direnak ezagutu ditugu: Oskar Hernández, Alicia Sellés eta Alicia Rey. Beraiek argitu digute zein izango den bere gaurko lana: guri lagundu eta gidatu baina, batez ere, zalantzan jartzea eta pentsaraztea. Gure aldetik, lan-saioaren xehetasun gehiago ezagutu nahi ditugu. Zer egin behar dugu? Zer espero da gugandik? Txemi Valdecantos arduratzen da lan-dinamika azaltzeaz. Ongi da. Argi dago (teorian behintzat; ikusiko dugu zer gertatzen den kronometroari eta paper zuriari aurre egiten diogunean).

60 parte-hartzaile baino gehiago, 3 aditu, 10 mahai zenbakidun, 3 lan-lerro orokor, ordenagailuak, folioak, boligrafoak... Kafea, infusioak eta zerbait gozoa ere bai. Ez da ezer falta. Orain bai, dena prest. Lanean hasi behar dugu. Txosten batek gidatzen gaitu gure dinamikan. Hiru galdera-multzok eta bakoitzari esleitutako denborek markatuko dute lan-erritmoa. Helburu bat: gure gai-arloari lotutako proiektuaren prototipo bat diseinatzea, jardunaldia amaitzean azaldu beharko duguna. 10:00ak dira. Ez dago denborarik galtzeko.

Lehenengo ideiak agertzen dira, norbaitek ordenagailuan tekleatzen du, beste batzuek post-itetan hitzak eta ideiak idazten dituzten bitartean. Aurpegi pentsakor eta kontzentratuak ikusten dira, zer egin eta horraino nola iritsi adosteko elkarrizketak entzuten dira. Proiektu posibleek forma hartzen dute, galdera hauei erantzuten diegun bitartean: nork inspiratzen gaituen, norekin kolaboratu nahiko genukeen gure proiektuan, norentzat egiten dugun, zer baliabiderekin, zer zailtasun izango ditugun... Galdera horiei Alizienak eta Oskarrenak gehitzen zaizkie, gure hasierako ideiari beste buelta bat ematera bultzatzen gaituztenak. Kafe gehiago, mesedez!

Denbora agortzen ari da. 13:00ak dira. Lankideen proposamenak entzuteko unea iritsi da. 10 prototipo inspiratzaile: irisgarritasuna, gazteentzako komikiak irakurtzeko klubak, liburutegiko webgunearen eta espazio fisikoen arteko konexioa, gure argazki-ondareak konta ditzakeen istorioak, podcastak, irakurketa-gomendio partekatuak... Badirudi ideiak ez direla falta.

Txaloka agurtzen dugu goiz motibagarri hau. Orain, entzundakoari eta ikasitakoari buruz hausnartu beharko dugu, hilabete gutxi barru argitara emango dugun proiektu hori marraztu ahal izateko. Alicia Reyk goiza hastean zioen bezala, interesgarriena 13:30etik aurrera gertatzen dena izango da. Eta ados gaude. Hau ez da hemen amaitzen. Orain hasten da onena. Informatzen jarraituko dugu.