Getxoko azoka eta Irudika topaketa

Udazkena bertako komikigintzari dagokionez beti izan ohi da oparoa. Alde batetik komiki lan berriak aurkezteko garaia izaten delako eta bestalde, azoka eta topaketa bereziak ere ugaritzen direlako.

Azoka pare bat aipatu nahi ditugu hemen. Lehena eta urte mordoa bizkarrean daramatzana Getxoko Komiki Azoka izango da, aurten 18. aldiz ospatuko da urriaren 18tik 20ra. Azoka honetan komiki postuak jartzen dira, komiki berrienak, argitaletxeenak, bigarren eskuko komikienak, fanzineenak, merchandising postuak e.a. Postuez gain, ordea, komikiaren inguruko hainbat hitzaldi, mahai-inguru eta aurkezpen ere burutzen dira. Bertako komikizale, komikigile eta baita kanpoko jendearentzat ere erreferente bilakatu den azoka da honakoa.

Eta bigarren aipamena berriz Irudika topaketari egin nahi diogu. Aurten Irudika profesionalentzako ilustrazio topaketaren 3. edizioa ospatuko da Gasteizen urriaren 24tik 26ra. Bertan ilustratzaileentzako hitzaldiak, editore eta kultur agenteentzako hitzaldiak, hitzorduak eta elkarrizketa profesionalak, sorpresazko tailerrak, sektore paraleloak eta ilustrazio zein animaziorako egoitza artistikoak antolatzen dira. Iaz egoitza artistikoa lehiaketa Maite Caballerok ilustrazioan eta Genís Rigolek animazioan eskuratu zuten. Aurtengo edizioaren kartela Maite Caballerok landutakoa da.

Getxoko Komiki Azoka
Irudika