Ikusteko Musika. Mundu guztiko musika tresnak

Musika tresnen zientzia da organologia, eta funtsean, hiru iker eremu ditu.

Lehenengo eremuak jatorriak eta loturak ikertzen ditu, batez ere etnologian eta antropologian oinarrituz.

Bigarren eremua musika tresnen ikerketa praktiko bat da, haien deskribapen materialari lotua, eta horretarako, nola eginak dauden eta nola jotzen diren begiratzen du; bestalde, ikuspuntu soziologiko batetik kokatzen ditu musika tresna eta intrumentista.

Hirugarren eremua musika tresnen sailkapena da: aurreko bietatik dator eta eztabaida ugari sortu ditu adituen artean, zeren inongo sailkapen sistemak ez baitu agortu hain aberatsa den eta beti garatzen ari den material instrumentala.