'Iparraldea bertan' zikloaren XXII. edizioa martxoaren 7an hasiko da eta hiru disziplina ezberdin ezagutu ahalko ditugu

Hiru disziplina eta helburu bat. Iparraldea bertan bueltan da XXII. edizioarekin berriz ere euskal kultura eta historia lau haizetara zabaltzeko. Martxoaren 7an hasiera emango diogu Koldo Mitxelena Kulturunean edizio berri honi. Hiru asteez, asteartero, gure kultura eta historiaren ezaugarri berriak ezagutu ahalko dituzu modalitate artistiko ezberdinen bidez. Animatuko al zara?

Hego eta ipar Euskal Herria jada ez dago muga fisikoengatik bananduta, baina oraindik muga psikologikoak mantentzen direla esan genezake. Bi ertzak batzeko, ezinbestekoa izango da pertsonen eta kultur-eragileen arteko hartu-emana sustatzea. Horregatik, Iparraldea bertan zikloarekin hurbilduko gara benetan hain urrun ez dagoen Iparralde horretara. Beraz, hiru hitzordu izango ditugu KMKn arratsaldeko 19:00etan.

Lehenik eta behin, Julen Achiary eta Maddi Oihenart izango ditugu gurekin martxoaren 7an. Biek emango diote hasiera zikloari, kantuari buruz dakitena praktikan jarriz kontzertu batekin. Ikuspuntu eta esperientzia desberdinetatik, musika formatuan eskainiko digute haien ezagutza, euskal kultura herrikoiaren legatu ederrenetako bat eskainiz.

Bigarren saioan, martxoaren 14an, Adur Larrea marrazkilariak Lurbinttoko ohoinak lana aurkeztuko digu. Sortzaile honek Lapurdiko XVIII. mendeko une historiko bat hartu du oinarri, eta ikusleokin elkartuko da lan hori eraikitzen aurrera eraman duen sorkuntza-prozesuan sakontzeko. 

Martxoaren 21ean, agur esango diogu beste behin zikloari, baina kasu honetan, Maia Iribarne eta Paxkal Irigoyenekin batera. Haien Bañolet lanaren proiekzioa izango dugu eta aurkezle lanetan, Beñat Iturrioz batuko da. 2021eko udan Garazi eskualdeko biztanleekin batera garatu eta grabatu zen proiektu parte-hartzailea da Bañolet. Horrela, zuzendariek, herriko aktore ez profesionalekin batera, asmatutako herri bat aurkeztuko digute, eta horretarako, haurtzaroko begirada oinarri hartuko dute. Bi zuzendariek sortutako filma ikusi eta gero, aurkezpena egingo dute. Azkenik, Iparraldea bertan zikloari beste behin agur esateko, proiekzioa eta solasaldia ondoren, kontzertu txiki bat izango dugu, non Iribarnek eta Irigoyenek filmerako konposatu eta grabatu duten musika originala zuzenean disfrutatu ahalko dugu.