Iparraldea Bertan, aurten ere KMKn

Iparraldea Bertan zikloaren XXIV. edizio honetan Iparraldearekin partekatzen dugun kulturaz gozatuko dugu berriro. Otsailaren 25etik martxoaren 18ra bitartean konpartituko ditugu film laburrak, errezitaldi musikalak eta Martin Lerissaren azken diskoaren aurkezpen emanaldia. Saioak 4 asteartetan egingo dira hurrengo eduki hauekin:

• Otsailak 25. Gastibeltza Filmak: Euskal zinema Iparraldetik.
• Martxoak 4. Hiru emazte kantari gogoan (errezitaldia).
• Martxoak 11. Kamila Zubeldia & Aguxtin Alkhat (errezitaldia).
• Martxoak 18. Mattin Lerissa. "Mundu zabalerako" diskaren aurkezpena.

KM Kulturuneak eta Euskal Kultur Erakundeak elkarlanean antolatzen duten zikloa da Iparraldea Bertan.

GASTIBELTZA FILMAK_Euskal zimena Iparraldetik. Otsailak 25
KM Kulturuneak Euskal Kultur Erakundearekin batera antolatutako proiekzioa, Iparraldea Bertan zikloaren barruan:
Gastibeltza Filmak 2018an sortu zen Lapurdin, euskal historiak soinuz eta irudiz kontatzeko. Historia hauek Euskal Herritik kontatzeko beharrak bultzatu zituen, euskaratik pentsatuak eta euskaraz eginak.
Egin dituzten filmen lagin bat erakutsiko digute, bi film laburrekin:

     - Ximinoa. Itziar Leemans-en fikzioa (Al Borde Filmsekin koprodukzioan). Junek, udako lehen lana aurkitu du. Constance zaintzen du, maitasun eskasa duen neskato sentikorra. Laster mantsotzen du haurra eta urte osoan bere haurtzain izateko ilusioa hazten zaio. Haurrari lotzen zaion heinean, klase harremanen bortizkeria eta bere identitatearen ukapena deskubritzen ditu.

     - Muga. Eñaut Castagneten fikzioa (Mirkotunarekin koproduzkioan). Joxeanentzat, Euskal Herrian mugarik ez da. Astero alde batetik bestera pasatzen da, zerrien saltzeko. Kamarurentzat ordea, oztopo eta lanjer guzien sinonimoa da muga. Alta, haien bideek elkar gurutzatuko dute.

HIRU EMAZTE KANTARI GOGOAN_Martxoak 04
KM Kulturuneak Euskal Kultur Erakundearekin batera antolatutako emanaldia, Iparraldea Bertan zikloaren barruan:
Ikusgarri hau, Euskal Herriko hiru emazte kantari aipatzeko eta argitan emaiteko sortua izan da: Lurdes Iriondo, Maite Idirin eta Estitxu Robles Arangiz. 1960 eta 70eko hamarkadetan emazte guti zen taulen gainean kantari. Garai hartan dena egiteko zen, dena egiten ari eta euskal kontzientzia ere sortzen ari zen.
Egiazko militante lan bat egin dute : Hizkuntza, kultura, Aberria, sozial saila…Gai horiek oro erabiltzen zituzten berek egin kantu berrietan.

Emaztearen tokia egin dute gizon kantarien artean bai eta gizartean. Gaur egun ez dira hemen beren lekukotasuna emaiteko eta ikusgarri honen bitartez nahi ditugu eskertu egin duten lan ederrarentzat eta utzi daukuten altxorrarentzat.

KAMILA ZUBELDIA & AGUXTIN ALKHAT_Martxoak 11
KM Kulturuneak Euskal Kultur Erakundearekin batera antolatutako emanaldia, Iparraldea Bertan zikloaren barruan:
Bakoitzak bestearen proiektu ezberdin batzuetan parte hartu ondotik, idazlan edo kantuan, Kamila Zubeldiak (Unama, Saioa) eta Aguxtin Alkhatek bikote akustiko berria osatu dute. Iraganean idatzitako kantuak abesteaz gain herri honi beste sorkuntza batzuk eskaintzea dute xede, hitz landuak melodia goxoekin uztartuz.

MATTIN LERISSAREN "Mundu zabalerako" diskaren emanaldia_Martxoak 18
KM Kulturuneak Euskal Kultur Erakundearekin batera antolatutako aurkezpen emanaldia, Iparraldea Bertan zikloaren barruan:
Behorlegitarraren hirugarren lana joan den azaroan argitaratu zen. Hamar kantuk, gehienak folk moduan, osatzen dute albuma. “Mundu zabalerako” du izenburua; kantu gehienak berak musikatu ditu eta, aldi berean, Aguxtin Alkhat, Mixel Ducau, Jojo eta Ramuntxo, Manex Pagola eta Robert Charlebois-en doinuak berriz hartu ditu. Musikarietan, Mixel Ducau (gitarra, ukulelea, perkusioak, txirula, saxofoia) Iñaki Dieguez (eskusoinua) eta Txomin Duhalde (bateria) lagun izan ditu proiektu honetan.

Hitzegileetan, jadanik aipatutako Aguxtin Alkhat eta Manex Pagolaz gain, Itxaro Borda, Manex Erdozaintzi Etxart, Pantzo Hirigarai, Daniel Landart eta Jean-Louis Davant-en idatziak goza daitezke. Hain zuzen, Manex Erdozaintzi Etxarten kantu batek izena eman dio diskoari.

Euskara, adiskidetasuna, libertatea, migranteen egoera latza... Mattin Lerissak hainbat gai jorratzen ditu azken urteetako gertakariak hausnartzeko asmoz. Diskoa abenduan aurkeztu zen 59. Durangoko azokan eta KMKn izango dugu horren lehenengo emanaldia.