Javier Balda. Maiztasunak / Frecuencias

Irudien denbora eta muga

Denboraren, irudien eta hauen irudikapenaren aurkako norgehiagoka-prozesu berezi horretan, sentipenak etengabe berrantolatzen dituen eta "ziurgabetasun iraunkor" pertsonala eragiten duen (Gerard Richter-en baimenarekin) esparru horretan, sortzen da aldez aurretik dauden irudien –norberarenak zein besteenak– jabetze zatikatua, hau da, nolabaiteko ikusizko zurztasuna onartzeko prozedura, dakigunak baliozko izateari uzten dionean eta zer edo zer berria edo desberdina erabat finkatzen ez denean. Beraz, ez da ausazkoa imajinario propio berri bat sortzea modaren, arkitekturaren, diseinuaren eta kontsumoaren alorretako argitalpenen topaketari eta manipulazioari esker. Margoaren irrika, aztarna uzten duen gaia, une batez neutralizatuta.

Itxaropenez eta fedegabetasunez beteriko jarrera hau argazkilaritzarekin eta margolaritzarekin lotura duenaz jabetzen da, hauen ohiko balioak alde batera utzita, espazio berriak eta esanahi sinkopatuak osatzen dituzten estratuak, sedimentazioak eta zatiak balira bezala. Collage-joko konplexu honetan agertzen da eraginek eta ikaskuntzek sortutako biltegiratze grafikoa, abstrakzioaren eta irudien zalantzan-jartzearen zorduna den irrealitatea, alegia. Collage horiek, efektu zinetiko batean, grabatutako mugimendu-irudi bilakatzen dira ere, hala nola ibiltzearen ekintza edo hiriko ibilbide eta egituretan barna mugitzea. Testuingurutik ateratako mugimendu hauek maiztasunen eta ausazko loturen ikuseremu bat sortzen dute, norabiderik gabeko bide batean gurutzatzen eta txandakatzen diren bilbeak, dosi hipnotiko jakinekin batera.

Artearen ideiak, neurri handi batean, aurreko garai batetik datoz, lehendik dagoen zerbaiten ikuspegitik. Aurretikoaren ikuspegi horren eta bilaketaren estimuluaren artean kokatzen da egin ez dugunaren eta izan nahi genuenaren errepikaketa malenkoniatsua, eta bertan ahalegintzen da artista orain, ohartu gabe, bere iraganaren zati bat berreraikitzen, besterik ez.

ERAKUSKETA
Ganbara, 3. pisua
2018/09/13 – 2018/11/10
Asteartetik larunbatera
11:00-14:00 / 16:00-20:00
Jai egunetan itxita