KMK eta LURRALDEA

HITZA lagun izan dugu azken asteetan Errege Katolikoen kaleko 16. zenbakian. Datozeneta, aldiz, LURRALDEA izango da erakusleiho honen ardatz, KMKrekin lotuta beste kontzeptu bat alegia. Izan ere, Koldo Mitxelena Kuturunearen Liburutegia, irakurketa publikorako gunea izateaz gain, gure lurraldeko, hau da, Gipuzkoako ondare bibliografikoa eta dokumentala identifikatu, bildu, kontserbatu eta zabaltzeko lekua ere bada.

Bere mendien berde kolorea eta bere bidezidorren marroi tonua zeru baten azpian, non, lur honetan askotan gertatzen den bezala, hodeiak agertzen diren. Gure lurraldearen geografia osatzen duten mendiak, han-hemenka baserri, herri eta hiriz zipriztinduak. Jendea bizi den eremu txiki eta handiak, bideek, galtzadek eta errepideek elkartzen dituztenak. Lotzen eta komunikatzen gaituzten konexioak, ibilgailuen, pertsonen, ezagutzen, ideien eta istorioen fluxua erraztuz. Gaur egun ezagutzen dugun Gipuzkoa ehundu zuten kontakizunak. Gipuzkoako historia osatzen duten istorio txikiak, gure Liburutegia bere kolore guztietan bildu, kontserbatu eta zabaltzen duena.

  

 

KMKren bigarren leiho hau LURRALDEARI eskaintzen diogu eta bi poemaz lagunduta egingo dugu. Hemen duzue horietako bat.
 

JAIZKIBELGO MENDI GAILURREAN
Arantza Etxeburua , 1992

Zure sabelean dautza
gure arbasoen urratsak,
usu gure zaldunek

zure bihurguneetan zeharkatutako
bideak,
baso jori ziren horietan,
gaur antzu diren landetan
ozpelean
jauntxoek damakilengan ereindako haziaren
semeak.

Zutik diraute,
hilik,
itsas-lur begiraleen
dorreak,
hala ere, piratak
oraindik lehorreratzen dira gauean.

Eta,
itsas-lanbroa denean,
kresal usainean,
urrunean
zaldien kaskoen hotsak entzuten dira,
itzalak zamalka,
asapalan
Jaizkibelgo mendi gailurrean.

© Arantza Etxeburua
Iturria: Basquepoetry.eus