KMK eta ONDAREA

Zenbat istorio kontatu dira gure baserrien suaren inguruan. Zenbat oroitzapen partekatuak familiarekin eta lagunekin gure etxeetan. Familiako eta tokiko bizitzako pasarteak, bizi garen komunitatearenak. Gure memoria partekatua eraikitzen joan diren bizitzaren zatiak, nolabait definitzen gaituztenak baina, aldi berean, norberaren historia osatzera gonbidatzen gaituztenak, beste batzuen parte bilakatuz, ondare ukiezin hori eratuz.

Mahai-zapi berde batekin apaindutako mahaia, gure historiaren bilakaeraren, gure ohituren eta gure lanbideen lekuko izan diren gure mendi eta basoen antzera. Kolore gorriz inguratutako mahaia, elikagaiak berotu eta bihotzak epeldu egiten dituen gure sukaldeetako suaren antzera. Zenbait plater gainean dituen mahaia, gaudenon eta jada utzi gaituztenen hutsune hori gogora ekarriz. Dagoeneko ez dauden arren, beren ondarearekin gure memoria sortzen lagundu zutenen omenezko eserleku hutsak. Guztiontzat dago lekua. Mahai bat topaketarako, oroitzapenerako, elkarrizketarako... 

Hain zuzen ere, hemen, irakurketa eta topaketa gune honetan, esertzera gonbidatu nahi zaitugu. Zure denbora, zure hitzak, zure ideiak, zure irakurketak, zure kontakizunak, zure begirada... partekatzera. Izan ere, gure ondarea ez da gertatu eta kontatu zigutena bakarrik. Gure ondarea ere gaur egun gertatzen dena da, elkarrekin moldatzen duguna, etorkizuneko memoria marraztuz. Hori da gure ondare partekatua.