KMK Liburutegiko bilduma bidaiaria

Nola iristen da KMK Liburutegiko liburuetako bat erakusketa bateko beira-arasara? Nola eramaten dira kartelak KMK-ko planeroetatik museo bateko hormetara? Prozesua zehatza da, eta hainbat pertsona (bildumaren arduraduna, posta, zaharberritze taldea...) arduratzen dira dokumentuak manipulatzeaz, lekuz aldatzeaz, espazioan kokatzeaz eta baldintza egokietan erakusteaz.

Prozesu guztia museoak edo erakusketa-guneak Liburutegira idatzitako mezu elektroniko batekin edo egindako dei batekin hasten da. Bildumako lanen batek (edo batzuek) komisarioaren interesa piztu du, haren erakusketetako baten kontakizuna osatzen edo ilustratzen baitu. Lan hori erakusketan erabil dezake? Erantzun aurretik, Liburutegiko taldeak obraren erabilgarritasuna eta, garrantzitsuena, kontserbazio egoera egiaztatu beharko ditu. Obra "sasoian badago", erakusketan parte hartu ahal izango du. Hori bai, bidaia segurua eta erosoa izan dadin, Liburutegiak informazio gehiago behar du. Facility Report-a hain zuzen ere. Txosten horretan, besteak beste, Liburutegiko pieza erakusteko espazioa eta baldintzak zehazten dira: zein aretotan kokatuko den, zein argi egongo den bertan, zein tenperaturatan gordeko den, nola zainduko den... Hori funtsezkoa da liburutegiko dokumentuak erakusketan dauden bitartean behar bezala kontserbatuko direla bermatzeko.

Baldintza horiek bermatuta, Liburutegia eskatutako pieza bakoitza baloratzeaz arduratzen da, dagokion asegurua prestatzeko. Horretaz gain, dokumentu bakoitzaren kontserbazio-txostena landuko du ere, obra bueltan etortzean jatorrizko egoera berdinean datorrela ziurtatu ahal izateko. Aldi berean eta beharrezkoa bada, obrak Liburutegitik irten aurretik zaharberritu egingo dira.

Eta agurraren eguna heldu da. Lanek ikusgai egongo diren espazioraino bidaiatu behar dute. Obrak behar bezala manipulatu eta enbalatzeko material berezia erabiliko da: eskularruak, kontserbazio-kaxak, hodiak, zorroak, aparra... Lan honetan adituak diren profesionalek dokumentu bakoitza bildu eta bidaiarako prestatzen dute.  

Hilabete batzuetan, liburu, gutun, lamina edo argazki hori istorio berri baten parte izango da. Horri esker, bisitariek liburutegiko pieza horiek ikusteko aukera izango dute.

Baina, bidai guztiak bezala, hau ere amaitu egiten da. Erakusketak ateak itxi eta kontaketa horren parte izan diren obra guztiak etxera itzuli behar dute. Bidaia lasaia izan dela eta obrak Liburutegira egoera onean itzuli direla egiaztatzeko unea da. Eta horrela izaten da. Dokumentuak bere apalategietan, kutxetan eta planeroetan kokatzen dira berriro. Agian etorri berriek bidaiako gorabeherak kontatuko dizkiete beren balda-kideei. Agian etorkizunean beste istorioren baten parte izango dira. Auskalo!

Gogora ekarriko ditugu KMK Liburutegiko dokumentuek parte hartu duten istorio horietakoren bat? Hona hemen batzuk:

1. 90 berriak. San Telmo Museoa, 2023
2. Iván Zuluetaren asaldura. Artium Museoa, 2022-2023
3. Komunikazio-inkomunikazio. Tabakalera, 2022
4. Kearen eta lanbroaren artean. Sigfrido Koch Bengoechea. San Telmo Museoa, 2021
5. Komunikatu saltzeko: imajinatu, komunikatu eta saldu. Museo de la Industria Armera, 2021
6. 68aren ostean. Artea eta praktika artistikoak Euskal Herrian 1968-2018. Arte Ederren Bilboko Museoa, 2018-2019
7. 1839 Bergarako Besarkadaren aurrean. Keinua eta interpretazioa. Zumalakarregi Museoa, 2016
8. Jokoak. Materia eta erronka. San Telmo Museoa, 2016
9. Emakumeak eta itsasoa. Untzi Museoa, 2016

Eta gogoratu, oraindik garaiz zabiltzatela Clima ideal. Udako kartelak erakusketaz San Telmo Museoan disfrutatzeko. Bertan, KMK Liburutegiko funts grafikoko hogei kartel baino gehiago daude ikusgai, baita bildumako beste dokumentu batzuk ere.

• Datak: 2023ko uztailaren 1etik urriaren 15era
• Ordutegia: asteartetik igandera, 10:00-20:00