Komikitik sortzailera: Lewis Trondheim

Laurent Chabosy izenaz jaio zen 1964. urtean Fontainebleau-n. Bere burua, Lewis Trondheim izengoitiaz, ‘Les formidables aventures de Lapinot’ komikiarekin ezagutzera eman zuen. Pertsonaia 1980.ko hamarkadan sortu zuen, komikigintzan trebatzen joateko. 1990. urtean L’Association argitaletxea sortu zuen beste komikilari batzuekin batera. 

Trondheim ezin da funtzio edo genero batean kokatu, era askotariko lanak egin dituelako. Gidoilari zein marrazkilari gisa aritzen da eta abenturazko komikiak, umorezkoak, superheroienak, fantasiazkoak, western-ak… denetarik egin izan du.  

‘Las amapolas de Irak’ komiki autobiografikoa emazte duen Brigitte Findaklyrekin batera sortu zuen, emaztearen bizipenak oinarri hartuta. ‘Donjon’ seriean, gazteleraz ‘Mazmorra’, umorea eta abenturak uztartzen ditu Joann Sfarrekin batera. ‘Texas Cowboys’-en western generoa ere lantzen du. Oso lan desberdinak diren arren, ‘Density’-n eta ‘Infinity 8’ seriean zientzia fikzioan barneratzen da. Lehenengoan botereak dituen neska baten istorioa kontatzen digu eta bigarrena espaziontzi batean garatzen da. ‘Cómo hacer un cómic’ liburuan ordea, narratiba alde batera utzi eta Trondheimek eta Sergio Garcíak, komiki bat sortzeko gakoak azaltzen dizkigute.

Sari desberdinetarako izendatua izan da sarritan: Harvey, Eisner, Ignatz, Angouleme… eta esaterako, Angoulemekoa eskuratu uzen 2006 urtean. Delcourt etxeko argitalpenen zuzendaria ere izan da.

Ikusi dugun moduan egile anitza dugu Trondheim eta gure Komikitekan, aipatutako lanak eta beste batzuk deskubritzeko aukera paregabea ere badaukagu.