Lekualdatze baten kronika

Ekainak 16, ostirala. Arratsaldeko 20:30ak. KMK-k ateak ixten ditu, baina aldi baterako bakarrik. Berrikuntza-, hobekuntza- eta zaintza-hilabeteak izango dira datozenak. Bitartean, aste gutxi barru, zerbitzu batzuk hiru egoitza berritan egongo dira eskuragarri: Errege Katolikoen kaleko gunean, Santa Teresa Komentuan eta Gipuzkoako Probintziako Artxibo Historikoan, Oñatin.

Ekainak 17, larunbata. Goizeko 8:30ak. KMK-ko hiru ate nagusiak itxita daude. Gaur ez dira irekiko. Hala ere, zentroko alboko sarbideetako bat irekita dago. Hortik sartzen da liburutegiko lantaldea. Egun berezia izango da gaurkoa. Guztia planifikatu ondoren, lekualdaketa hasten da. Dagoeneko zenbait funts egoitza berrietan daude. Hala ere, nobelak, komikiak, filmak, eskuizkribuak edo eskuliburuak beren txandaren zain daude. Milaka dokumentu, egoitza berrietan birkokatuko direnak.

Duela hilabete batzuk. Dokumentuen zerrendak, paketatzeko materiala, funtsen egoeraren analisia eta balorazioa, herritarren maileguen eta interesen azterketa, garraio-zirkuituak, ekipoen koordinazioa, etiketak, kutxak eta zeloa, espazio berrien diseinua, ikusmina, urduritasuna eta ilusioa... Talde-laneko ordu asko, KMK-ren bilduma behar bezala lekualdatzen dela bermatzeko. Aldi berean, KMK-ko erabiltzaileek beren irakurketez eta ikerketez ahal den bezain laster gozatzen jarraitu ahal izateko ahalegina.

 

Uztailak 3, astelehena. Goizeko 8: 30ak. Bi aste igaro dira. Liburutegiko apalak pixkanaka husten ari dira. Kutxa bat ixten duen zeloaren soinua, kutxan sartu beharreko liburuen siglak "kantatzen" dituen lagun baten ahotsa, kalean mailegu-gune berrirako bidean trakeskan dabiltzan orgak, entzuten den telefonoa (liburuak noiz itzuli ahal izango dituen jakin nahi duen norbait)... Taldeek batera lan egiten dute, kaxak ordenatuta eta bloketan pilatzen dira, aretoak gero eta bakartuago, espazio berriak gero eta biziago...

Uztailak 14, ostirala. Gutxi falta da liburutegiko erabiltzaileak berriz ere egunero agurtzeko. Atzo jarri zen azken eleberria mailegu-gune berrian (Stefan Zweig-en Viaje al pasado). Komikiak, biografiak, bidaia-gidak, filmak eta telesailak, musika... ere prest daude. Bizitzaz eta ilusioz betetako espazio berria, datorren uztailaren 26an lehen bisitariak noiz iritsiko zain dagoena.

Gipuzkoako Probintziako Artxibo Historikoa ere bertan hartuko diren funtsak jasotzen hasi da. Julio Urquijo, Busca Isusi, Gabriel Celaya edo Koldo Mitxelenaren liburutegiak hemen egongo dira datozen hilabeteetan. Artxiboko hainbat gela ere prestatzen ari dira, liburutegiko ondare-funtsekin lanean jarraituko duen taldeari harrera egiteko. Haiek arduratuko dira, halaber, gune horretan beren ikerketekin jarraitu nahi duten guztiei arreta emateaz.

Uztailak 26, asteazkena. Orri zuria. Oraindik deskubritzeke dagoen etapa berri bat. Hori bai, hau elkarrekin idatzi eta gozatuko dugu. Errege-Erregina Katolikoen kaleko mailegu-gune berrian gaude zuen zain.

Laster arte!

kmk.eus/obras