Luterl taldeak aurten Txarli omenduko du

 

Luterl taldea Ondarrun komikia sustatu, bultzatu, eta hedatzen duen taldea da. Komiki jardunaldiak, erakusketak, fanzine zein aldizkariak eta baita irratsaioak ere burutzen dituzte. Artelekun 90. hamarkadan Napartheideko kideek fanzine bilduma osatu zutenetik jaso izan ditugu Luterl taldearen argitalpenak. Egun Komikigunean daude gordeta, adibidez Globho (1980-) eta Globhito (1985-), hurrenez hurren, aldizkari zein fanzinea.

 

Luterl taldeak gainera komikia, komikilariak zein komikigintza ardatz hartuta, urtero komiki jardunaldi batzuk antolatu ohi ditu. Aurten, Txarli, herriko artistaren bakarkako lehen erakusketa eta irratsaio bat antolatu dituzte otsailaren 18tik 27ra Ondarroako Udaleko erakusketa aretoan.

 

Txarli nortasun agiriaren arabera Carlos Gracia da, Bilbon sortua 1969an, baina berez, ezaguna Txarli gisa da batez ere. Portugalete eta Trapagaranen hazi bazen ere, gerora Getxo eta Deustun bizi izan zen, nahiz eta gaur egun Ondarroa duen bizileku. 

 

Kazetaritza ikasi zuen baina ez du horretan inoiz lan egin. Beste lanbide batzuk izan ditu. Zineman eta telebistan ere aritu izan da ‘atrezzista’ eta ekoizpen lanetan, Euskal Telebistan eta La Sextan esaterako. “Un mundo casi perfecto” (2011), “El precio de la libertad” (2011), Mario Onaindiaren bizitzan oinarritutako miniseriea, “Ander” (2009) eta “Un otoño sin Berlin” (2015) filmeetan lan egin du.

Marrazten ere artista da Txarli, txikitatik aritu da afizio gisa marrazten. Bere lehen irudiak Eibarko Porrot fanzinean agertu ziren, eta behin abiatuta El Tubo, La Gallina Vasca, Deustuko Prest eta Kalegorria aldizkarietan argitaratu ditu bere komiki zein ilustrazioak. Bere lagunek berak argitaratutako komikien bilduma egin eta oparitu zioten ‘Relatos incomodos’ izenburupean. Gerora berriz, Mariola Reigosarekin batera ‘Miren Olatu’ zaindari banpiroaren bi album egin zituzten autoekoizpen gisa.

 

Gainera grafitigilea eta muralista gisa ere ondo moldatzen den artista multidisziplinarra da Txarli. Gatz musika taldearen ‘Zertan sinetsi’ abestiaren bideo-klipean ikus daiteke Txarli sprayarekin lanean.