Urtarrileko eleberri eta komiki nobedadeak

Iritsi berriak dira nobedade hauek mailegura. Azken asteetan jasotako fikziozko lanen zerrenda duzue jarraian, eta baita horien arteko aukeraketa bat ere modu xehetuagoan. Hemetxe irakurri, estekaren bidez katalogara sartu eta erreserbatu dezakezue gustukoena gero bila pasatuz (Errege-Erregina katolikoen kaleko 16 zenbakian). Gozatu!

ELEBERRIAK
"Incensurable" eleberrian, Lectrice Santos filosofoaren ibilbidea kontatzen da: plazerari eta zentsurari buruzko hitzaldi batengatik baztertua izan ondoren, eleberri polemiko baten desagerpena zalantzan jarrriko du. Literaturari eta erotismoari buruzko mintegi batean, Lolita bezalako lan klasikoen irakurketa defendatuko du, eta bere jarduna ideologia ahaztearen aurkako jarrera bihurtuko da. Umorea eta jakintza uztartuz, Luna Miguelek egia, hizkuntza eta literatur bazterketa aztertu ditu, irakurlea hausnarketara gonbidatuz.  

Vigdis Hjorthen "Quince años: la primera revolucionaria" eleberriak, Paula 15 urteko neskaren istorioa kontatuko du. Paularen bizitza aldatuko da udara batean bere amak amonari idatzitako kartak aurkitzen dituenean.  Horietan, bere amak, ahizparen lorpenak asmatu ditu, aitaren arrakastak ere bai, eta ia ez du Paula aipatzen, bere familia-harremana eta bere nortasuna zalantzan jarriko ditu egoera honek faltsukeriazko mundu bat azaleratuz. Nerabezarora hurbiltzean, Paulak mirariz eta zailtasunez betetako mundu bati egin beharko dio aurre.

Unai Goikoetxearen "Solsticio de invierno" Ander Crespo inspektorea protagonista duen thrillerra da, Ertzaintzaren 4. gizahilketen taldeko kidea da. H9 izeneko serieko hiltzaile batek Bilbon izua ereiten duenean gertatuko da istorioa. Crespo eta bere taldea hura harrapatzen saiatuko diren bitartean, krimenak 90eko hamarkadako desagerpenei lotuta daudela konturatuko dira. Ikerketak ustekabeko egiekin eta honek izandako galera pertsonalek markatutako iraganarekin egin beharko die aurre.

Valerie Fritsch -en "Limones" Eleberriak Munchausen sindromearen kasu bat kontatuko du, eta irakurleak espero ez duen baina barnean susmatzen duen hiltzaile baten burmuinera eramango gaitu. Maitasuna eta krudeltasuna estuki lotzen diren istorioa da, ustekabeko bira ugariz betea. Hizkera oso bisuala eta prosa zaindu eta xehea erabiliz idatzitako eleberria da.  

Ana Merinoren "El camino que no eligimos" eleberri hunkigarria da, bizitzak ustekabeko bideetatik nola bultzatzen gaituen azaltzen duena. Juanak, hogei urtez ezkonduta egon ondoren, Connor bere senarraren bat-bateko alde egiteari aurre egin behar dio, Cécile lagunarekin batera ulertu asmoz. Lieke, ikertzaile gaztea, zirkulu honetan sartuko da Connorrekin harreman batean murgilduz. Maitasun, sekretu eta galeren artean, hiru emakumeek beren lekua aurkituko dute eta beren burua berrasmatzen saiatuko dira; bien bitartean, landare negutegi batek isil-isilik islatzen du desamodioa eta beren bizitzetan argia nola bilatu.

J.S. Fletcherren "Asesinato en Middle Temple" eleberriak 1912ko udan Londresen Middle Templeko eraikin batean gorpu bat aurkitu zutela kontatuko digu. Frank Spargo kazetariak, polizia baino lehenago iritsiko da bertara, eta azpijokoz, erromantzez eta sorpresaz betetako ikerketa batean murgilduko da. Spargok, ustekabeko jira-biran, hilketaren atzean dagoen egia nahasgarria aurkituko du.

KOMIKIAK
"Maurizia: biziminaren hotsa" Garbiñe Ubedaren eskutik, Mauriziaren irudia ezagutzen lagunduko gaitu. Emakume horren bizitza zailtasunak markatu zuen, eta, hain zuzen ere, horregatik bihurtu zen funtsezko erreferentzia, benetakotasunaren sinbolo eta euskal kulturaren ikono. Haren doinuek dar-dar egiten dute barrutik; haren ahotsean lurraren indarra sumatzen da, sugarra bezain hautemanezina. Maurizia Aldeiturriagak, bere pandereta lagun duela, denboraren joanari erronka egiten dion lotura gisa aurkezten du bere burua, iragana eta etorkizuna une berean, beti bizirik eta orainean, lotuz.

Silvia Vecchini eta Sualzo dira "Las palabras lo pueden todo" komikiaren egileak. Lan honetan Sara dugu ardatz, zein une latzak igaro ondoren isilean geratuko den. Tartean istripu bat, gurasoengandik bereiztea eta bere lagunik onenarekin borrokatu beharko du. Badirudi barruan zerbait gelditu egin zaiola. Baina dena aldatzen hasiko da bere bizitzan ohikoa ez den maisu bat agertuko den unean, T. jaun zaharra. Harekin antzinako ipuinen eta hebrear alfabetoarekiko interesaren bidez Sararengan ikasteko zaletasuna piztuko da. Noraezean dabilen edo oroimenik ez duen gizon baten itxura izan dezakeen arren, letra misteriotsu horiei esker, Sarak pixkanaka bere adierazteko gaitasuna berreskuratu eta adiskidetasuna, familia eta baita maitasuna ere ulertzeko behar dituen hitzak eta bideak aurkitu ahal izango ditu.

"Calva" Tereza Drahonovskaren gidoia eta Stepanka Jislovaren ilustrazioak dauzkan komiki autobiografikoa da, non bi egileek begirada hurbil, kritiko eta umoretsu batetik heldu diote alopeziari. Obrak zalantzan jartzen ditu edertasun-eredu tradizionalak eta genero-identitateari buruzko ideiak, ilea galtze hutsetik harago doan kontakizun zintzo eta hunkigarri baten bidez. Liburuak onarpen pertsonalerako bidean lagunduko dio Terezari, feminitateari eta norberaren irudiari lotutako presio sozialari buruzko gogoeta egin ahala. Gainera, komikiak ilearen esanahi sinbolikoa aztertzen du hainbat kulturatan, ileordeetara jotzeko ohitura eta gutxi ikusarazitako gaixotasun baten inpaktu emozional eta ekonomiko handia jorratuz.

"Joe la pirata: la vida de ensueño de Marion Bárbara Carstairs” Huberten gidoiarekin eta Virginie Augustinen marrazkiekin osatutako komikia da. Marion Barbara Carstairsen edo lagunen artean Joe bezala ezaguna denaren bizitza kontatzen du. Abiadura, abentura eta emakumeak maite zituen, eta anbulantzia-gidaria izan zen Lehen Mundu Gerran. Uretako lehiaketetan aitzindaria izan zen, eta emakumez osatutako taxi-konpainia bat ere sortu zuen. Berrogei urtez gobernatu zuen Karibeko uharte bat, bere bizitza XX. mendeko askatasun indibidualaren eta arauen hausturaren omenaldi ere bihurtuz.

"Galdós y la ceguera", El Torresen gidoia eta Alberto Hernández Riveroren marrazkiek osatu duten komikian Benito Pérez Galdósen azken urteak ezagutuko ditugu. Ikusmen-galerak eta arazo ekonomikoek Botines bankarien familiaren eskuetan dagoen San Quintingo finka mehatxatzen dutenean. Elena Menaique erizainak familia horri lotutako sekretu bat gordetzen duen bitartean, Galdos Ateneora eramango dute, eta bertan Emilia Pardo Bazanekin elkartuko da, iraganeko oroitzapenak eta oraindik argitu gabe dauden tentsioak berriz zabalduz.

Jaume Font Rosselloren "Tutor por sorpresa" komikia. Luz zortzi urteko neskatoaren istorioa kontatzen du; eskola-jazarpena jasan ondoren, giltzapetu egin da eta eskolara joateari utzi dio. Bere aitonak Jaumerengana jotzen du, ikasteko konfiantza eta gustua berreskuratzen laguntzeko prest dagoen irakasle gazte batengana. Laguntza-harreman gisa hasten dena aurkikuntza mingarri bihurtzen da: biek abusu-iragan bera partekatzen dute beren ekintzen ondorioak beti saihestu dituen tutore baten esku.