Usue Egiaren 'Ura leporaino' komikia

2020ko martxoan gauza asko aldatu zirela badakigu. Bat-batean etxean sartuta geunden denok eta era askotariko egoerak gertatu ziren. Sorkuntzarako aukera ere izan zen, Usue Egiari pasa zitzaion bezala. Barrenak husteko aukera aurkitu zuen marrazkiaren bitartez eta hilabete berezi horietan eta ondorengoetan sentitutakoa jasotzen du komiki honek. 

Itxialdiko kontakizun autobiografikoa da, baina oso erreza da istorioarekin identifikatzea, etxean martxan jarri genituen planen bidez, edota garai hartan genituen kezkak eta zalantzak direla eta. Horiek gogora ekartzeko aukera ematen digu Egiak, marrazki sinpleez betetako egunkari honetan.  

Usue Egia Fernandez de Retana (1992, Durango), Ikus-entzunezko komunikazioak eta ondoren Arte Ederrak ikasi zituen Euskal Herriko Unibertsitatean. 

Txikitatik marraztu duen arren, azkenaldian bere lana ezagutzeko aukera gehiago izan dugu. 2021ean Durango Sor(tzaileen)Leku beka irabazi zuen ‘Ustekabean, krak’ proiektuarekin eta honek ‘Ura Leporaino’ argitaratzeko aukera eskaini zion.