Uztaileko komiki eta eleberrien nobedadeak

Iritsi berriak dira nobedade hauek mailegura. Azken asteetan jasotako fikziozko lanen zerrenda duzue jarraian, eta baita horien arteko aukeraketa bat ere modu xehetuagoan. Hemetxe irakurri, estekaren bidez katalogara sartu eta erreserbatu dezakezue gustukoena gero bila pasatuz (Errege-Erregina katolikoen kaleko 16 zenbakian). Gozatu!

ELEBERRIAK

Basim Khandaqjiren “Una máscara del color del cielo” eleberrian Ramalako errefuxiatu-esparru batean bizi den arkeologo palestinar batek, ustekabean, israeldar baten nortasun-agiria aurkitu eta haren itxura hartzea erabakitzen du, gizon horren bizitza bere eginez, hesiaren beste aldeko errealitatea barrutik ulertu asmoz.

“El canto de los corazones rebeldes” Thrity Umrigarren eleberrian txikitan India utzi zuen kazetari bat herrialdera itzuliko da, beste erlijio bateko gizon batekin ezkondu ostean familiak eraso eta herriak baztertu duen emakume bati buruzko erreportajea egitera. Topaketa horrek bere jatorriari eta lurperatutzat zituen zauriei aurre egitera behartuko du.

Pilar Asueroren “Las cabras” eleberrian txikitatik banaezinak diren lau lagunek beren bizitzak nola urruntzen diren ikusiko dugu: bata Txiletik Madrilera doa, kultura-munduan lekua bilatu asmoz, eta bestea ustekabeko amatasun bati aurre egiten ari da. Bizitza osoko adiskidetasun batek distantziari eta jada bat ez datozen bizi-bideei nola eusten dien kontatzen duen istorioa da honakoa.

Raquel Roblesen “Pequeños combatientes” eleberrian Argentinako diktaduran bahitutako militanteen alaba den neskato bat izeba-osaben eta amonen ardurapean geratu da, eta mundua gurasoen balioen arabera interpretatuko du. Bere egitekoa eustea dela sinetsita, anaiarekin batera itxura egiten eta oharkabean igarotzen ikasten du, iristen ez den itzulera baten zain.

“Zure arnasa zaintzeko” Nerea Baldaren eleberrian zaintza bere modu guztietan -seme-alabena, lagunena, komunitatearena eta norberarena- hausnartzen da. Ama baten eta haren alabaren arteko loturatik abiatuko da. Protagonistak ama eredugarria izan nahi du, baina behin eta berriz egiten du hanka, perfekzio hori existitzen ez dela konturatuz.

Kati Leatxe idazlea eta Estitxu Larrea ilustratzailearen “Amatxi maitia” eleberrian uda herrian, amonaren etxean, igarotzera behartutako hamabost urteko Iradik herriko emakume nagusien istorioak bilduko ditu. Ahots horien bidez, eleberriak luzaroan isilpean geratu ziren Nafarroako aurrepirinioko bizitzak berreskuratuko ditu.

KOMIKIAK

"Gon" Masashi Tanakaren komiki berezia da marrazkiaren errealismo ikusgarri eta xehetasun maila handiagatik. Umorea, abentura eta natura uztartzen ditu narrazio guztiz bisual batean, istorioak hitz bakar bat erabili gabe kontatzeko baititu.

"Idefix eta menderakaitzak" saileko "Kroketak erromatar erara" komikian, Idefixek eta bere animalia lagunek Lutecian erromatar ohiturak ezartzea eragotzi nahi dute, umorez eta abenturaz betetako istorio batean, adiskidetasunari, elkartasunari eta kultura-nortasunaren defentsari buruzko mezu argia zabaltzen du komikiak.

"Skinwalker" komikiak giro iluna du, terrorea, mitologia eta hazkunde pertsonala inspirazio-iturri ditu, marrazki adierazkor eta suspense etengabeko tonua ditu nagusi. Misterioz eta amerikar indigenen elezaharrez inguratuta dagoen komunitatea mehatxatuko du izaki aldakor batek.

Van Jensen-en "Arca" komikian, Lur hilezkor batetik mundu berri baterantz doan itsasontzi batean doaz bizirik atera diren pertsona zortedunak. Zerbitzari gazte batek salbazioaren promesa gezurra dela jakiten duenean, egia ezkutatzen dioten dirudunei aurre egin beharrean aurkituko da.

"Hilma af Klint: la voz en el templo" komikian, hamarkadetan zehar bidegabeki ahaztutako arte modernoko funtsezko figura bat berreskuratzen da, Kandinsky edo Mondrian baino askoz lehenago abstrakzioari aurrea hartu zion Hilmaren ibilbidea du ardatz komikiak: bere biografia, espiritualtasuna eta bere sorkuntza uztartzen ditu.

"Sandman mystery theatre" komikian, Wesley Dodds, jatorrizko Sandman, New Yorken 30eko hamarkadaren amaieran krimenaren aurka borrokatzen den zaintzaile maskaratuaren istorioa ezagutu dezakegu. Dian Belmonterekin batera, ustelkeriak, krimen antolatuak eta bidegabekeria sozialak markatutako kasuak ebatziko dituzte noir tonua erabiliz.