Zinema-aldizkariak KMK Liburutegian

Zinemaren historia 1895. urtean hasten da, zehazki abenduaren 28an, Pariseko Boulevard des Capucineseko areto batean. Bertan, August eta Louis Lumière anaiek Cinématographe Lumière "mugimenduzko irudiak transmititzen zituen asmakizuna" aurkeztu zuten eta La salida de los obreros de la fábrica Lumière film laburra eman zuten, minutu bat baino gutxiagoko iraupena zuen grabazioa. Izugarrizko gertakizuna!

 

Zazpigarren artea sortu zen, eta gaiari buruzko lehen argitalpenek laster argitaratzen hasi ziren. XIX. mendeko azken urteetan, argazki-aldizkariek zinema-albisteak eta mugimenduan zeuden irudi horien aurrerapen teknikoak jasotzen zituzten. XX. mendearen hasieran, 1910 eta 1915 bitartean, agertu ziren Espainian zineman espezializatutako lehen argitalpenak (Arte y Cinematografía, El Cine. Revista Popular Ilustrada edo El Mundo Cinematográfico), gertuko beste herrialde batzuetan bezala: Le Fascinateur (1903) eta Le Film (1914) Frantzian, Der Kinematograph (1907) edo Licht-Bild-Bühne (1908) Alemanian, Moving Picture World (1907) Estatu Batuetan edo, zertxobait geroago, Sight and Sound (1932) Erresuma Batuan. Argitalpen espezializatu horien hedapena hurrengo hamarkadetan gertatuko da, baina zinemari buruzko argitalpen orokorragoekin batera jarraituko dute gaur arte.

Eta zer gertatzen da Euskal Herrian? Ba al du oihartzunik zinemak euskal prentsan? Hala da. Euskal Herriko zinema-aldizkarien lehen erreferentziak hogeiko hamarkadakoak dira. 1927an, Bilbon Pro-Dis-Co argitaratu zen, eta, urte batzuk geroago, La Revista Cinematográfica Local (Donostian argitaratua), Coliseo Albia edo Cinematografía Bilbaína.

Gerra Zibilaren eztandak argitalpen horietako asko desagertzea ekarri zuen, baina gerra ostean titulu berriak sortu ziren. Batzuk, Guión edo Imagen bezala, enpresak edo erakustaretoak editatuak dira eta hau izango da 40ko hamarkadan zehar mantenduko den joera. 50eko hamarkadan berrriz Revista Internacional del Cine edo Film Ideal izenburuak argitaratu ziren. Hamarkada honen amaieran beste bi argitalpen nabarmengarri agertuko dira: Festival, Donostiako Nazioarteko Zinemaldiaren buletina, eta Miqueldi, Bilboko Zinema Dokumentalaren Nazioarteko Lehiaketarena.

80ko hamarkadara arte aurrera egin eta bertan aurkituko dugu Eusko Ikaskuntzak argitaratutako Cuadernos de Sección. Cinematografía (1985) aldizkaria. Horrekin batera ditugu ere Andoaingo Zine eta Bideo Eskolak bultzatutako Irudimena (1988) aldizkaria eta Nosferatu (1989). 90eko hamarkadan, DeZine, Zazpiki. Zine eta bideo paperak (1995) eta hiru euskal hiriburuetako zine-klubek eta zinema-aretoek argitaratutako hainbat aldizkari eta buletin sortuko dira: Solaris, Orhum: revista de cine edo El cine sin ir más lejos.

Zinema KMK Liburutegian

KMK Liburutegitik zinemari buruzko funts hemerografikoa ezagutzera gonbidatzen zaitugu. 1912 eta 2025 arteko 130 zinema-buru baino gehiago, munduko hainbat lekutan argitaratuak. Ingelesezko, frantsesezko, euskarazko, gaztelaniazko edo portugesezko tituluak, besteak beste. Paperezko zein online argitalpenak. Ondare aberatsa, hemen ikus dezakezuna.

Eta ez hori bakarrik. Gure prentsa-atari digitalean kontsultatu ahal izango duzu interesatzen zaizun informazio guztia. Aldizkarietatik haratago, egunkariek ere zeluloidearen inguruko guztiaren berri eman dute: azken estreinaldiak, zinema kritikak, filmei buruzko publizitatea... Sartu gure webgunean, idatzi gure prentsa digitalizatuan aurkitu nahi dituzun hitzak eta ziur sorpresaren bat baino gehiago hartuko duzula!

 

Amaitzeko, gure Liburutegian gordetako zinema-funts osoaz gozatzera gonbidatzen zaitugu: 17.500 film baino gehiago zure eskura, zinemari buruzko 300 karteletik gora, argazkiak, komikiak, biografiak... Ziur gaude bilduma horrekin zinemaz are gehiago gozatuko duzula.

 

Talking about dreams is like talking about movies, since the cinema uses the language of dreams, Federico Fellini