“Zinema” liburutegia

Filmak pantalla handian ikusteko bederatzi egun eta, horren ondoren, beste 356 egun non zinemaz gozatzen jarraitu ahal izango dugun, bai zinema-aretoetan, baita etxean ere. Agian denok ezagutzen ditugun plataforma digitaletako batean egingo dugu. Hala ere, badira beste aukera batzuk ere, eta horietako bat da, zalantzarik gabe, KMK Liburutegiaren ikus-entzunezko bilduma zabala eta anitza. 10.000 film baino gehiago, klasikoak zein gaur egungoak.

 

KMK karteldegia

Gustoko dituzu beldurrezko istorioak? Melodramak nahiago? Agian komedia on bat nahi duzu? Edo suspensezko film bat? KMK Liburutegiko zine eta serie funtsean, genero ezberdinetako filmak aurkituko dituzu. Badira klasikoak Desayuno con diamantes, El Padrino, Cabaret, Cinema Paradiso edo El Gran Dictador, baita azken hamarkadetan gehien ikusi diren filmak ere: El pianista, El señor de los anillos, El viaje de Chihiro, As bestas edo Call me by your name.

Gure Errege-Erregina Katolikoen kaleko 16. zenbakian dugun egoitzara etorri eta 3 pelikula har ditzakezu maileguan, etxean 3 astez gozatu ahal izateko. Eta ez badugu bilatzen ari zaren filma aurkitzen, desiderata bat bidali ahal diguzu.

 

Urrezko pelikulak

Hainbat eta hainbat tituluren artean, Donostia Zinemaldian Urrezko Maskorrarekin saritutako filmak ditugu, nola ez. Zerrenda honetan horietako batzuk aurkituko dituzu. Animatzen zara baten bat eramatera?

Zinema musika

Eta istorio onei buruz ari bagara, soinu-banda ahaztezinei buruz ere ari gara. Batzuetan konpas pare bat nahiko dira pelikula bateko eszena batean bete-betean murgiltzeko. Nola ez imajinatu Tiburon filmeko marrazoa, behin eta berriz errepikatzen diren bi nota horiek entzuten direnean? Edo nola ez larritu, Psicosis filmeko soken eta haizeen kirrinkekin. Erraza da, bestalde, Meryl Streep eta Robert Redfordekin Afrikako lurretan hegan egitea I Had A Farm In Africa melodia mitikoa entzutean, edo Hobbiton herrixkako magia sentitzea Shoreren Concerning hobbits konposizioa entzutean. Soinu-bandak filmen funtsezko elementuetako bat dira, zalantzarik gabe.

KMK Liburutegian konpositore ospetsu horien sorkuntzez gozatu ahal izango duzu: John Williams, Ennio Morricone, Nino Rota, James Horner, Vangelis edo Yann Tiersen-en musika dugu eskuragarri. Filmekin bezala, 3 CD har ditzakezu maileguan eta hiru astez gozatu.

Zinemaz gozatu nahi duzu? Zatoz KMK Liburutegira eta disfrutatu oraindik ikusi ez dituzun film horiekin.