Zuriketa eta ebaluazioa, proiektuak egonkortzeko aukera

K bulegoak Zuriketa eta ebaluazioa, proiektuak egonkortzeko aukera formakuntza saioa antolatzen du azaroaren 16an Gipuzkoako kultura eragileentzat.

Saio honetan kultura proiektuen zuriketa eta ebaluazioari helduko diegu era parte hartzailean, kudeaketaren atal hori sendotu eta horretarako gaitasunak lantzeko xedez. Kultura proiektu bati lotutako eragileentzat dago zuzenduta formakuntza.

Egutegiko azken orriak aletzearekin batera, zuriketa izaten da kultura proiektuak burutzeko azken zeregina, bereziki dirulaguntza deialdien esparruan. Kudeatzaile askok betebehar etsigarritzat hartzen dute egitekoa, azken ordainketa jasotzeko urrats saihetsezina, alegia.

Nekez ikusten badugu ere, proiektuak behar bezala ebaluatzeko abagunea da une hau, egitasmoa bera jasangarriago eta egonkorragoa izan dadin. Are gehiago, proiektuak egoki kudeatzeko oinarrizko zeregina da.

Álvaro Fierrok gidatuko du saioa. Fierro Ekonomian doktorea da Euskal Herriko Unibertsitatean, eta Ekonomia Aplikatua eta Kultura gurutzatzen diren esparruan dihardu ikertzaile eta irakasle. Era berean, proiektuak ebaluatzen aditua da, hainbat kultura erakunderentzat jorratutako lanei esker.

Azaroak 16 osteguna - 15:30etik 18:30era
Donostian (Santa Teresa komentua)

Saio euskaraz emango da

Izena emateko epea hilaren 14ra arte (egun hori barne)

Eman izena hemen

Irudia. Silvia López de Lacalle Gurruchaga