Poesialeku

Maialen Berasategi Catalánen hiru poema

 

GAITZIK EZ 

Behin nahastuta elkarren galtzerdiak
normaldu ondoren zurrungak
zaindu ondoren koinatuaren eriondoa
eta behiala opari izandako filodendroaren ura,
nola eten ohearen haraindian ipurmasailaz
sorbaldaz glaziar-haran bat higatu duen horrengana
lokitik lokira lotzen zaituen astibidea.

Ez duzue miseria handirik
ez eskandaluzkorik behintzat
isurbideetan behera bota beharrekorik
eta poztxoren baten tangoak
dantzatzen zaituzte
inoizka sueltoan inoizka elkarri helduta
arrantzalearen eskarmentuak
amua beitaz bazkatzen duen legez.

Damua gaztetxoen pribilegioa da
ikasi zenuten koilara histuen ahurrean
baino ez begiratzen atzera
tarteka irrika piztu arren
hatz-puntta bat edo hiru sartzeko
beste inoren saltsatan, gatzez ondo dagoen
probatzeko soilik edo
arnasteko zerua.

Baina ikusi ondoren haren larru zelaian
isiltasun sismikoz arroak arrotzen
enarak txitatzen eta hiltzen
jakinik zure omoplato erdi idatzien ifrentzuan
bera bizi dela beti, ermitau, bera duzula zain
zain dagoela jakin gabe ere,
ez duzu behar sendabiderik baizik igual
plazebo pixka bat
dantzan samur segitzeko eta bare
zure bizikide kronikoarekin.

ARNASKARIARI

Pixka-pixka bat zoriontsuago zara
telebista errebobinatu daitekeenetik:
aukeramena, libertatea, netflix
(segi betetzen sinonimoen zerrenda).

Begiak ezin altxa eman dituzun garaietan
ez bazeunde legez, normal deritzozu
eskuan beti zerbait eduki behar gorriari
urrutiko agintea, dutxa-sagarra, labana bat
zeozer pisuduna, ez pisutsua
erorita ere istripu huts izango dena eta ez
zanpamendu erabatekoa.

Jendea multzoka abolitzen duen mundu honetan
ez zara oso berezia, dona-dona katona
multzo honetantxe egokitu zaizu
izateari uztea.
Eta makalaldiaren azkena makalaldia bera
baino beldurgarriagoa denez
eskerrak ematen dizkiozu gaur sofari
bihar sardexka-labanen tiradera zapalari. 

Ez zaude oso hilda, soil-soilik hartu zaitu
gabetuen herren hotzilak,
tracy Chapmanen kantu batean
udazkena emateko abulia hunkituak.
Hipermerkatuko erdi prezioek jendea
erdi jende egiten duten moduan
aldi baterako espedienteek ere egiten dute
aldi baterako jendea.

Baina eta zer.
arnaskaria zara azken batean
eta arnasak oxidazioa dakar eta oxidazioak
ximeldura beltza bihar ez bada etzi
edo etzi ez bada bihar:
aldi baterako jendeak
ez du bereizten aldea.

 

ERORTZEN DA

Gehienetan esperantza erortzen da
zaharrak erortzen diren bezala
halabeharrean ere tragiko.
Paroxismoaren antitesi bat
airean uzten dituena luma arre batzuk eta
gela hustuen oihartzuna.

Mokor hautsien kultura
ikasten dugu eta onartzen
ia-iakotasunera darwinismoz egokiturik
inoizka lanbasa ateraz, garbitzeko
txita jaio aurretxoan
armairu-goienetatik erori eta
krak lehertzen den txolarre-arrautza.

Orodun desjabetuon hezur-patu biguna.

Hunkimena soilik geratu bazaigu
seinale asko-asko daukagula baina
kendu digutela beste guztia.

 

Eskuan beti zerbait, Maialen Berasategi Catalán (Balea Zuria, 2021)

​​​​​​​